١٦ سبتمبر ٢٠٢٠

تَعَلَّم تطوير المواقع في ساعتين

By null

صباح الخير عليكم. دراسة تطوير المواقع مش حاجة سهلة, و لو فاكر ان ممكن تتعمل بكورس ساعتين او سكشنين كلية او اسبوع/اسبوعين يبقى انت متعرفش حاجة عن المجال و تعالى نشوف هو ايه بالظبط بدل ما تتوه ناس كتير. :)

الويب كورس ساعتين

من اشهر الجمل اللي اتقالتلي شخصياً او شوفتها/سمعتها هما:

  • "الويب سهل يتذاكر ف ساعتين"
  • "بتوع الويب دول محارين او صنايعية اخرهم ويب, مبيعرفوش يبرمجوا"
  • "الفرونت اند سكشنين في الكلية سهل يعني"

الجمل دي حقيقي بتدمر نفسية الديفلوبر. تخيل كده تقعد تذاكر 6 شهور لسنة و يجي واحد جاهل و هباد يقولك انك مبتعرفش تبرمج واخرك ويب يا صنايعي. والحقيقة ان الموضوع بدأ ينتشر بغباء لدرجة ان في جروبات كاملة على فيسبوك مصدقين الجملتين دول.

الفرونت اند ديفلوبر بيحتاج على الاقل 4-6 شهور عشان يقدر يخش على حاجة Entry level او Internship. في ناس اعرفها وصلت معاهم سنتين لحد ما اشتغلوا اول مره في الويب.

الفرونت اند سهل يخلص ف سكشنين

الفرونت اند اخرهم بيعملوا ديزاين الموقع وشوية HTML, CSS وخلاص

الكلام ده برضه ينم عن جهل تام بالمجال. انا مليش علاقة بالديزاين. انا مطور, مهندس برمجيات, مبرمج. انا كفرونت اند بيجيلي ديزاين جاهز من فريق التصميم و بشتغل على اني احول الشكل ده لـ UI Markup و UI Logic, بجانب حاجات تانية كتير.

من ضمن مسؤولياتي كفرونت اند:

  • Performance Optimisation
  • SEO
  • Memory Management
  • Network Caching & Management
  • Codebase Architecture
  • Accessibility Engineering
  • Asset Optimisation
  • Testing
  • Debugging

وحاجات تانية كتير. كل ده ملوش علاقة بالديزاين.

ولو بصينا على المصميين فا دول برضه مش كورس ساعتين ولا شهر ولا شهرين. مجال التصميم مجال صعب و بيحتاج صبر و مثابرة يمكن اكتر من الفرونت اند كمان. تخيل بقى واحد يساوي الاتنين ببعض.

ولا حتى الديزاين يتذاكر في ساعتين او شهرين حتى. إقرأوا عن المجالات قبل ما تتكلموا عليها. ارجوكم.

الفرونت اند اسهل من الباك اند

الجملة دي سمعتها كذا مره, و بتنم برضه عن الجهل و الاقتناع الاعمى بفكرة ان الفرونت اند محّارين او صنايعية مبيعرفوش يبرمجوا بينما بتوع الباك اند هما اللي تنانين مجنحة بيشتغلوا بقى مع سيرفرات و داتا سينترز و اوعى الداتابيز ديزاين والـ distributed الخ.

الكلام ده برضه مش صحيح. مفيش حاجة اسمها مجال اسهل من التاني. في حاجة اسمها انت مهتم بإيه فا تدرسه. بلاش شغل ده شغلهم سهل او شوية HTML CSS JS كده وخلص الموضوع. كل واحد ليه مسؤولياته.

مسؤولياتي كفرونت اند قولتها فوق, بينما مسؤوليات الباك اند مختلفة تماماً, و في النهاية احنا الاتنين مبرمجين مطورين تنانين مجنحة بشرية بنشتغل سوا مش ضد بعض عشان نطلع مواقع جميلة تيجي حضرتك تهبد عليها.

الفرونت اند ميعرفوش حاجة عن الباك اند

اتقالتلي برضه والله. اللي هو "انت ايش عرفك اللي بيحصل ف الباك اند اصلاً, انت اخرك تشتغل ع الديزاين و خلاص". و مش اعرف ارد على دي ازاي الصراحة غير ان الشخص اللي بيقول الجملة دي مفتقد لكل معاني المنطق من دماغه.

زي ما قولت, الفرونت و الباك بيشتغلوا سوا. احياناً بتوصل اننا بنقعد على نفس الجهاز او نفس الـ Shared editor عشان نشوف مشكلة مثلاً بتحصل في حالة معينة. و لازم من ضمن مسؤولياتنا كفرونت اند ديفلوبلز اننا نعرف الباك اند شغال ازاي. ازاي هنتعامل معاها, و كل ما علمنا و معرفتنا بالموضوع تزيد كل ما نبقى احسن في دورنا.

الفرونت اند بيقبضوا اقل من الباك اند

زمان كان الويب بسيط, كان فعلياً HTML CSS JS وحتى جافاسكربت في الوقت ده مكانتش متطورة ربع التطور اللي هي فيه النهاردة. كان دايماً الناس بيعلقوا الفرونت اند على شماعة الـ UI Markup و خلاص على كده. وبالتالي ده ساب اثر موجود في بعض الشركات النهاردة. لكن الأغلبية العظمى بتتعامل دلوقتي بمساواة اكتر و على حسب الخبرة و الادوات و دورك هتشتغل على ايه بالظبط و حاجات تانية.

الفرونت اند مش Software Engineers

لا والله, احنا software engineers بكل المقاييس. عندنا كل الـ principles اللي اي software engineer بيمشي عليها و كل الـ best practices و السلطات و البابا غنوج بتوع السوفتير انجيينرج. احنا مهندسين زينا زي غيرنا.

الفرونت اند ميعرفوش يعني ايه Computer Science

جملة تانية بتنم عن جهل. والمفروض اجابة حاجة زي دي تبان لو وصلتوا هنا طول المقالة يعني. كوننا Software Engineers ده بيتطلب اننا نكون على دراية و علم تام بالـ Computer Science و العلوم اللي وراها. كون اني رافض نظامكم المتخلف اللي بيفرض عليا اتعلم مثلاً 8 مواد رياضيات مش معناه اني مش على دراية بعلوم الحاسب اللي بنبرمج عليه و ميديلكش الحق انك تشوف نفسك عليا.

الـ ecosystem بتاع الفرونت اند مش ثابت

مش حقيقي. يمكن الكلام ده كان من 5 سنين كده, لكن دلوقتي المجال شبه ثابت تماما. في تطورات بتحصل كل يوم طبعاً زي اي مجال تقني, بس ده مش معناه ان كل الشركات بتحول لكل حاجة جديدة كل يوم. تمن الـ upgrades غالي على اغلب الشركات, و اللي مش غالي عليهم بيبقى مشاريعهم كبيره و مش محتاجين حاجة زي الـ upgrades دي. كل يوم بيطلع library جديدة اه, بس ده مش معناه اننا لازم نتعلم كل حاجة ولا نبقى ابطال خارقين, و لا معناه ان سوق العمل مش مستقر.

لو حابين تعرفوا اكتر او تتناقشوا ف حاجة تقدروا تشرفوني بقى على Valarium ونتكلم سوا هناك.


Written by Nabil Tharwat

Nabil Tharwat is a software engineer and mentor who's super in love with all things accessibility and performance. He's host of The Weekly Noob podcast and his content has reached thousands of people around the world.

Learn more about Nabil.